សម្តេចតេជោប្រកាសថា មន្ត្រីរាជការជួរមុខនិងក្រុមអាទិភាពនឹងទទួលបានវ៉ាក់សាំងដូសទី៤ ប្រភេទ Pfizer
ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានប្រកាសអនុញ្ញាតឱ្យកីឡាករកីឡាការិនី អ្នកសារព័ត៌មាន និង សិល្បករសិល្បការិនី អាចទទួលបានវ៉ាក់សាំងជាមួយនឹងមន្ត្រីរាជការជួរមុខសម្រាប់ដូសទី៤ ដោយប្រើប្រាស់វ៉ាក់សាំងប្រភេទ Pfizer ដែលមានក្នុងដៃស្រាប់។
ក្នុងឱកាសអញ្ជើញប្រគល់ប្រាក់រង្វាន់របស់រាជរដ្ឋាភិបាលជូនកីឡាការិនី អ៊ុក ស្រីមុំ ក្រោយដណ្តើមបានមេដាយមាសពិភពលោកពីការប្រកួតកីឡាប៉េតង់ដែលធ្វើឡើងនៅឯវិមានសន្តិភាព នៅព្រឹកថ្ងៃទី៥ ខែមករានេះ សម្តេចតេជោ មានប្រសាសន៍ថា ដើម្បីធានាបានភាពស៊ាំ ក្រុមអទិភាពរួមមាន មន្ត្រីរាជការជួរមុខ កីឡាករ កីឡាការិនី អ្នកសារព័ត៌មាន និង សិល្បករ សិល្បការិនីជាដើមនឹងទទួលបានវ៉ាក់សាំងដូសទី៤។
សម្តេចតេជោថា៖ «បច្ចុប្បន្ននេះយើងមានវ៉ាក់សាំងប្រភេទ Pfizer ចំនួនជាង ២លាន ៣សែនដូសនៅក្នុងដៃ ដូច្នោះអាចយកដើម្បីចាក់ធ្វើជាដូសទី៤ ដល់ក្រុមអទិភាពប្រមាណ ៧០ម៉ឺនដូស»។
គួរបញ្ជាក់ផងដែរថា ការលើកឡើងរបស់សម្តេចតេជោដែលអនុញ្ញាតឲ្យក្រុមអទិភាពនឹងទទួលបានវ៉ាក់សាំងដូសទី៤ នាពេលនេះ គឺស្របពេលដែលករណីឆ្លងមេរោគកូវីដ-១៩ បំលែងថ្មីកំពុងតែរាតត្បាតនៅលើពិភពលោក ខណៈប្រទេសកម្ពុជាវិញក៏បានរាយការណ៍ករណីអូមីក្រុងនាំចូលចំនួន៩៤ករណីផងដែរ៕
ព័ត៌មានជាច្រើនទៀតសម្រាប់អ្នក
